ኢምባኮ ህዳር 14 ቀን 2018 ዓ.ም የኢትዮጵያ ምድር ባቡር ኮርፖሬሽን በቢሾፍቱ ከተማ ለሚያስገነባው የቢሾፍቱ የባቡር አካዳሚ የመሠረት ድንጋይ የማስቀመጥ ስነ-ስርዓት አከናወነ።

የባቡር አካዳሚ የሀገራችን ዋና ዋና የልማት ማዕከላት ብሎም ከሁሉም አጎራባች ሀገሮች ጋር ለማስተሳሰር ዘመናዊ የባቡር መሠረት ልማትን በመዘርጋት ቀልጣፋ የትራንስፖርት አገልግሎት እንዲኖር የሚያስችል ነው ሲሉ የትራንስፖርትና ሎጅስቲክስ ሚኒስትር አለሙ ስሜ (ዶ/ር) ገለጹ።

ደህንነቱ የተጠበቀ እና ከፍተኛ አቅም ያለው የትራንስፖርት ዘዴ፣ ለኢኮኖሚ እድገት፣ ለክልላዊ ትስስር እና ለብልጽግና ጎዞ ማሳያ ነው። የባቡር ልህቀት ማዕከሉ የሀገራችንን ብሔራዊ ፍላጎቶች በማስተሳሰርና በማጠናከር የአንድነታችን ተምሳሌት አካላዊ መገለጫ በመሆን  በትራንስፖርት እና ሎጅስቲክስ  ዘርፍ የተቀየሰውን ፍኖተ ካርታ ፣ በፖሊሲዎች እና በስትራቴጂክ ጉዟችን እውን ያደርጋል ብለዋል፡፡

የኮርፖሬሽኑ ዋና ስራ አስፈፃሚ ህሊና በላቸው(ኢ/ር) በበኩላቸው በእያንዳንዱ ታላቅ ተቋም የጉዞ ምዕራፍ ውስጥ ወሳኝ የሆኑ ቁልፍ ጊዜያትና ራዕይ ወደ ተግባራዊነት የሚቀየርበት ወሳኝ ቀን መሆኑን ገልጸው የመሠረት ድንጋይ የማስቀመጥ ሥነ- ስርዓቱ ለዕውቀት፣ ለፈጠራ እና ለኢትዮጵያ እና ለምስራቅ አፍሪካ የባቡር ዕድገት መሠረት ነው ሲሉ ገልጸዋል፡፡

በሀገራችን እየታየ ያለው ኢኮኖሚያዊ ዕድገት ከፍተኛ የትራንስፖርት መሰረተ ልማት የሚፈልግ በመሆኑ በዚህም  ዋና ዋና የልማት ኮሪደሮችን  እና አጎራባች ሀገራት ከወደቦች ጋር በማገናኘት የንግድ ፍሰቱን ለማቀላጠፍ ፣የህብረተሰቡን ማህበራዊ ትስስስር እና ኢኮኖሚያዊ ተጠቃሚነትን ለማሻሻል  የባቡር ትራንስፖርት  ከፍተኛ አስተዋፅኦ ያበረክታል።

ስለዚህም ኮርፖሬሽናችን ይህንን ተልዕኮው እውን ለማድረግ የተለያዩ ፕሮጀክቶችን ቀርፆ መሠረተ ልማቱን ዘርግቶ ለአገልግሎት ማብቃቱን በቀጣይ የሚከናወኑትን በስትራተክ ዕቅድ  ተነድፎ እየተተገበሩ እንደሆነ ተናግረዋል፡፡

ኮርፖሬሽኑ የኢንዱስትሪው ተደራሽነት ለማስፋት፣ብቁ የሰው ሃይል የማፍራት  ራዕይን ሰንቆ  የባቡር ኢንስቲትዩት በማቀቋቋም የስልጠና ፈቃድ አውጥቶ በተለያዩ የባቡር የሙያ ዘርፎች  የተግባር ስልጠናዎች እየሰጠ መሆኑን አስታውቀዋል፡፡

የባቡር አካዳሚው የኮርፖሬሽኑን ስትራተጂ በማሳካት የባቡር ትራንስፖርት ተደራሽነትን ለማስፋት የዘርፉ የልማት ጉዞዎች  የሚያስቀጥሉ ሙሁራን በራስ አቅም ለማፍራት ከዚህም አልፎ ከአጎራባች ሀገሮች ለሚመጡ ባለሙያዎች ስልጠናዎችን በመስጠት ለሀገራችን የውጭ ምንዛሬን ለማስገኘት የሚያስችል  በምስራቅ አፍሪካ  የልህቀት ማዕከል የመሆነ ራዕይ አለው፡፡

የቢሾፍቱ ከተማ አስተዳደር ከንቲባ አቶ አለማየሁ አሰፋ እንደገለጹት፤ አካዳሚው ለከተማዋ በረከትና ተጨማሪ የቱሪስት መስህብ ሆኖ ያገለግላል።

በመሆኑም አካዳሚው በተቀመጠለት ጊዜ እንዲጠናቀቅ ከተማ አስተዳደሩ ድጋፍ እንደሚያደርግ ገልጸዋል።

የቢሾፍቱ ከተማ አስተዳደር ከንቲባ አቶ አለማየሁ አሰፋ የአካዳሚው መገንባት ለከተማዋ ተጨማሪ የቱሪስት መስህብ እድል እንደሚፈጥር ጠቅሰው በተቀመጠለት ጊዜ እንዲጠናቀቅ የከተማ አስተዳደሩ ድጋፍ እንደሚያደርግ ገልጸዋል።

በኢትዮጵያ የጣሊያን አምባሳደር የተከበሩ ሲም ፋበሪዛ (ዶ/ር)፣ የፌዴራል እና የክልል የመንግስት የስራ ሃላፊዎች፣ አባገዳዎች፣ ሃዳ ሲንቄዎች፣ የሀገር ሽማግሌዎችእና የልማት ተነሺ ተወካዮች ተገኝተዋል።